Rubio: Hamas nýtir palestinar sum skjøldur í Gasa

Ísraelski forsætisráðharrin, Benjamin Netanyahu, og amerikanski uttanríkisráðharrin, Marco Rubio, hava havt fund í Jerusalem, og á tíðindafundi aftaná segði Netanyahu, at álopið hjá Hamas á Ísrael 7. oktobur verður ongantíð gloymt.

- Takk fyri stuðulin úr USA, segði Netananyahu.

Eisini Trump, forseti, varð heiðraður:

- Hann er besti vinur, sum Ísrael nakrantíð hevur havt í Hvítu húsunum.

Marco Rubio segði, at Hamas skal lata allar gíslar leysar alt fyri eitt.

- Tað var ein grumm gerð, segði Rubio og vísti til álopið 7. oktobur.

Óvikandi stuðul

Rubio legði afturat, at USA er óvikandi í stuðli sínum til Ísrael, tá talan er um at røkka teimum málum, sum eru sett í krígnum í Gasageiranum.

Amerikanski uttanríksráðharrin segði eisini, at tað var neyðugt at leypa á Iran fyrr í ár, tí landið er í holt við at menna kjarnorkuvápn.

Tíðindafólk spurdu Marco Rubio um støðuna í Gasa, og tá svaraði hann, at Hamas nýtir palestinar sum skjøldur í Gasageiranum.

- Hamas kundi lagt vápnini í stundini, og tað hevði tænt palestinsku søkini, segði hann.

Ísraelski forsætisráðharrin, Benjamin Netanyahu, segði á tíðindafundinum, at Ísrael tekur fulla ábyrgd av álopinum á Hamas-leiðarar í Doha í Katar í seinastu viku.