Føroyingauppgerð í Hannover

Føroyingauppgerð verður í Hannover í kvøld, har Elias Ellefsen á Skipagøtu og Kiel vitja Vilhelm Poulsen og Burgdorf.

Kiel hevur fult stigatal - Seks stig fyri sigrar á Erlangen, Wetzlar og HSV - men munurin hevur verið lutfalsliga lítil hvørja ferð. Elias Ellefsen á Skipagøtu hevur fingið góða byrjan upp á kappingarárið, og tey ellivu málini, sum hann skeyt ímóti HSV seinast, tryggjaðu honum pláss sum spælskipari á vikuliðnum hjá Bundesliguni. 

Í fjør kappaðist Hannover-Burgdorf leingi um fremstu plássini í Bundesliguni, men í ár hava Vilhlem Poulsen og teir ikki fingið eins góða byrjan. Higartil hava teir vunnið sær tvey stig upp á tríggjar dystir. Harumframt hevur Hannover spælt seg víðari úr 1. umfari í European League. Vilhelm Poulsen skeyt sjey mál í seinna dystinum ímóti Alkaloid.

Hákun og teir ímóti Aalborg

Hákun West av Teigum og teir í Füchse Berlin fáa stóra avbjóðing í Champions League, tá Aalborg vitjar í týska høvuðstaðnum seinnapartin. 

Føroyski vongurin skeyt seks mál í sigrinum á Nantes í 1. umfari, men áðrenn tað tapti týska meistaraliðið - sum brádliga segði farvæl við ítróttastjóran og segði venjaran úr starvi - ímóti Magdeburg, og seinast endaði aftur galið á útivølli ímóti Gummersbach.

Tí verður áhugavert at síggja, um bylgjurnar hava lagt seg hjá revunum í Berlin.