Danskar fregnartænastur á fund við uttanlandsnevndina í dag

Fregnartænasturnar hjá donsku løgregluni og danska herinum vera við, tá Sirið Stenberg, landsstýriskvinna í uttanríkismálum, fyrrapartin møtir í uttanlandsnevndini hjá løgtinginum.

Klokkan níggju fer uttanlandsnevndin at umrøða lógaruppskotið, sum gevur landsstýrinum víðari heimildir at seta revsitiltøk í verk móti Russlandi.

Ítøkiliga snýr málið seg um at seta tvey russisk reiðarí, Murman SeaFood og Norebo JSC, á svartalista. Bæði reiðaríini eiga skip, sum í dag fiska sambært galdandi fiskiveiðusáttmála millum Føroyar og Russland.

ES og Noreg hava illgruna

Heimildin at revsa russisku reiðaríini byggir á ein illgruna hjá ES og Noreg um at skip hjá reiðaríunum eru ein hóttan móti trygdini í okkara parti av heiminum. Ongar almennar ábendingar eru um, at skipini hava framt nakað ólógligt í føroyskum øki.

Nú skulu umboð fyri PET og FE, tað eru fregnartænasturnar hjá ávíkavist donsku løgregluni og danska herinum, greiða Uttanlandsnevndini frá, hvat tey vita um russisku skipini.

Lógaruppskotið um víðkað revsitiltøk móti Russlandi hevur ligið í uttanlandsnevndini síðani 28. august.

Nevndin hevur biðið um og fingið longda freist frá formansskapinum til 29. oktober at skriva álit.