Pisa-kanningin verður nú fjórða hvørt ár

Broytingin í Pisa-kanningini merkir, at føroyskir fólkaskúlanæmingar skulu til kanning fjórða hvørt ár, heldur enn triðja hvørt ár.

Tað sigur Eyðun Gaard, stjóri í Námi.

OECD skipar fyri Pisa-kanningini.

Føroyar eru ikki limir í OECD, men hava kortini luttikið í kanningini síðani 2006 sum partur av donsku luttøkuni.

Føroyar eru tó ikki við í donsku tølunum. Føroysku úrslitini verða viðgjørd fyri seg og eru tøk í Føroyum, samstundis sum møguligt er at samanbera tey við úrslit úr øðrum londum.

Síðani 2006 hevur kanningin verið gjørd triðja hvørt ár í Føroyum, við undantaki av broytingini, sum kom í sambandi við koronufarsóttina.

Nú verður kanningin gjørd fjórða hvørt ár.

Næstu ferð føroyskir næmingar í 9. flokki skulu til Pisa-kanning, verður í 2029. Úrslitini verða almannakunngjørd í 2030.

Kostnaðurin fyri føroysku luttøkuna hevur verið mettur til umleið 300.000 til 400.000 krónur um árið í trý ár. Tá eru kanningin, loyvir og frágreiðing íroknað.

Tá kanningin frameftir verður fjórða hvørt ár heldur enn triðja hvørt ár, verður hon eisini bíligari, sigur Eyðun Gaard.