Grønlendski landsstýrisformaðurin hildið røðu í ES-tinginum

Grønlendski landsstýrisformaðurin, Jens-Frederik  Nielsen, hevur í dag hildið røðu í ES-tinginum í Strasbourg.

- Í Grønlandi halda vit góðar møguleikar vera í samstarvinum við ES. Vit eru fegin um stuðulin, vit fáa. Seinastu mánaðirnir hava verið undarligir, segði landsstýrisformaðurin í røðuni, skrivar Sermisiaq.

ES hevði boðið Jens-Frederik Nielsen at halda røðu. Hetta er fyrstu ferð, at ein grønlendskur leiðari heldur røðu í ES-tinginum.

Jens-Frederik Nielsen sigur, at samstarvið við ES verður til fyrimunar fyri allar partar.

 

Jens-Frederik Nielsen í ES-tinginum

Jens- Frederik Nielsen og Roberta Metsola, forkvinna í ES-tinginum. (Mynd: Frederick Florin/AFP/Ritzau Scanpix)

Sterkur felagi

Roberta Metsola, forkvinna í ES-tinginum, sigur, at Grønland fer altíð at vera ein sterkur felagi Evropeiska Samveldinum. 

Hon vísir á eitt nú fiskivinnuavtaluna millum ES og Grønland og sigur, at ES er til reiðar at víðka samstarvið um ráevni og grøna orku.

Politikararnir í landstinginum fara í hesi tingsetuni at taka støðu til at játta pening til ein frágreiðing um fyrimunir og vansar við ES-limaskapi. 

ES-nevndin hevur boðað frá, at ES fer at tvífalda stuðulin til Grønlands upp í fýra milliardir frá 2028 til 2034.