Kultura: Friður á pallinum

Kultura í dag snýr seg um "Friður á pallinum," sum er fyrsti stóri leikur, ið verður settur upp í Varpinum í Klaksvík.

Tað er Klaksvíkar Sjónleikarfelag, ið hevur pallsett leikin, sum verður fyrmsýndur 24. oktober.

Uppsetingin er til heiðurs fyri Adelborg Linklett, ið var undangongukvinna í sjónleikaumhvørvinum í Klaksvík, og sum fór um sýn fyri góðum ári síðani. 

Myndir: Bárður Lydersen

Friður á pallinum, Anfinnur Heinesen

Annfinnur Heinesen leikstjórnar, Edward Fuglø hevur sniðgivið pallmyndina, og Nikolaj Falck er pallsmiður.

Andrias Justesen á Viðareiði hevur týtt leikin til føroyskt.

Klassisk farsa

"Friður á pallinum!" er ein skemtileikur, sum snýr seg um ein sjónleikarbólk, ið venur ein leik.

Hetta er ein klassisk farsa við margháttligum misskiljingum, stuttligum persónum og undirhaldandi fløkjum.

Leikurin, ið hevur upprunaheitið "Noises Off, varð skrivaður av enska rithøvundanum Michael Frayn og varð frumsýndur á West End í London í 1982.

Leikurin hevur síðani verið spældur víða hvar, og hann hevur vunnið nógvar heiðurslønir - eitt nú í Bretlandi og í USA.

Friður á pallinum

Stór krøv til pallmyndina

Leikurin gongur fyri seg í nútíðini, har sjónleikabólkurin spælir ein sjónleik, sum gongur fyri seg fyri umleið øld síðani. Tað setir stór krøv til pallmyndina.

Pallurin, sum er níggju metur í tvørmáli, kann snarast runt, so spælast kann bæði frammanfyri og aftanfyri pallin.

Pallurin er bygdur í samstarvi við Tekniska skúla í Klaksvík, og eru tað eru Sjúrður Sólstein, lærari, og næmingar á skúlanum, ið hava bygt pallin. 

Friður á pallinum

Níggju leikarar eru við í leikinum:

• Karl Sofus í Heimistovu
• Karl Marius Poulsen
• Hans Hjalti Skaale
• Jan Gardar
• Louis Poulsen
• Emry Jo
• Durita Samuelsen
• Jancy Kalsø
• Eliana Svøðstein

Friður á pallinum

Hvat: Kultura
Hvar: Í útvarpinum og á KVF Ljóð
Nær: Mikudagar kl. 17.05, og tá tað passar tær á KVF Ljóð