Nord Stream: Pólland vil ikki útflýggja handtikna mannin

Ein pólskur dómstólur hevur gjørt av, at ukrainski maðurin, sum er undir illgruna fyri at hava verið uppí, tá Nord Stream-gassleiðingin var sprongd, skal ikki útflýggjast Týsklandi, skrivar Reuters.

Maðurin, sum verður nevndur Volodymyr Z., hevur verið afturhildin í Póllandi síðani september. Ein týskur dómstólur gav boð um at handtaka ukrainska mannin.

Pólski forsætisráðharrin, Donald Tusk, segði fyrr í mánaðinum, at Pólland hevur ongan hug at útflýggja mannin. 

Tusk hevur sagt, at trupulleikin er ikki, at Nord Stream-leiðingin var sprongd, men leiðingin yvirhøvur var løgd í sínari tíð. 

Týskir ákærar siga, at  Volodymyr Z. er djúpvatnskavari, og hann hevur fyrr verið í ukrainska herinum.