Jóannes: Víkingur vann uppiborið

Jóannes Kalsø Danielsen viðgekk, at KÍ ongantíð veruliga stemplaði inn í steypafinaluósigrinum fyri Víkingi.

 - Vit standa við eini tómari kenslu í løtuni. Vit møta ikki nóg væl upp til finaluna í dag, sjálvt um tað er ein jøvn finala. Vit kunnu vera nógv betri enn vit eru, men Víkingur spælir ein góðan dyst taktiskt, og teir hava uppiborið sigurin í dag, segði bakkurin.

Hann helt, at Víkingur dugdi betur at spæla seg til vandamiklar kjansir, og at gera sær dælt av møguleikunum.

 - Tað plaga at vera vit, sum eru sterkir upp á deyðbóltar, so eg føli eitt sindur, at alt gongur ímóti í dag, men hatta er fótbóltur, staðfesti Jóannes Kalsø Danielsen.

Tað hevur verið heldur torførari enn vanligt, at spæla fótbólt í Klaksvík hetta kappingarárið. KÍ megnaði ikki at koma í evropeiskt deildarspæl, og í landskappingini stríðast teir bláu við at hanga í oddaliðnum NSÍ.

 - Vit hava havt fleiri niðurtúrar í seinastuni. Vit høvdu tríggjar møguleikar at koma í bólkaspæl, náddu tað ikki, og mistu sigurin ímóti NSÍ, og so hetta í dag, segði Jóannes Kalsø Danielsen, sum ikki hevur mist mótið kortini.

 - Í morgin fara vit í arbeiðshandskarnar, og so byggja vit uppaftur til í næstu viku, tí vit hava nógv at spæla um enn.