Í summar fer aftur at duna á Viðareiði

Tað er meira enn so komið fyri, at jarðfrøðingar hava grulvað runt á Viðareiði og leita eftir upprunan til dun og buldur, ið hevur verið at hoyrt í norðastu bygd í landinum. 

Onkur vil vera við, at orsøkin er, at tað spøkir í prestagarðinum í Ónagerði, meðan onnur hava tosað um boringar fyri jarðhita og jarðfrøðilig fyribrigdi undir bygdini. 

SÍ EISINI: "Jarðfrøðilig gáta á Viðareiði," Dagur og vika, 7. september 2013

Fer aftur at duna

Komandi summar mugu viðingar enn einaferð halda fast, tí tá aftur at duna í bygdini.

Neyðugt verður tó ikki at ringja eftir Jarðfeingi, tí upphavið til dunið verður hesa ferð legendariska danska rokkorkestrið D-A-D, ið verður høvuðsnavnið á Norðfestivalinum.

D-A-D hava verið í Føroyum nakrar ferðir. Fyrstu ferð var í 1999, tá teir spældu á Hálsi í Havn, og seinast var á Summarfestivalinum í 2011, tá teir spældu eina fantastiska konsert á Vágsbøi. 

D-A-D skuffar ongantíð

Uttan mun til hvussu ofta D-A-D hava verið í Føroyum, so er ein felagsnevnari fyri allar konsertirnar: Tær hava verið góðar. 

Hóast Minds Of 99 royna at sannføra okkum øllum um, at "alle skuffer over tid," so er tað eftir øllum at døma ikki galdandi fyri D-A-D.

Bólkurin skuffar ongantíð

Ikki so nógv humbuk.

Tað er kanska ikki so undarligt, tí tað er ikki so nógv humbuk við D-A-D. 

D-A-D eru Binzer-beiggjarnir, Jesper og Jacob, Stig Pedersen og Laust Sonne. Gittarar, bassur og trummur, og so verður talt til fýra og rokkað hart. 

Bólkurin hevur góðar sangir, ein góða sirkus-hest í bassistinum Stig Pedersen, og so ein verðinsklassa gittarist í Jacob Binzer. 

D-A-D, Stig Pedersen

Sannførandi á Copenhell

Hóast limirnir í D-A-D hava spælt saman í yvir 40 ár, og menn ikki blíva yngri, so duga teir enn at sparka hart reyv á einum palli.

Tað vísa allar konsertupptøkurnar, ið liggja á Youtube.com, eitt nú framførslan frá Sweden Rock í summar, so Norðfestival-gestirnir kunnu gleða seg. 

Serliga sannførandi var tað at uppliva donsku rokklegendurnar á fyrsta Copenhell eftir at koronafarsóttin í 2022. Skráin var á tremur við heimsnøvnum sum Kiss, Metallica, Iron Maiden og øðrum. 

Men tey, ið vóru til staðar, fingu sjón fyri søgn um, at konsertin hjá D-A-D, ið var høvuðsnavnið fríggjakvøldið hetta árið, stóð einki aftanfyri konsertirnar hjá stóru heimsnøvnunum. 

Jesper Binzer í Ragnarrokk

Í 2024 útgav D-A-D plátuna "Speed of Darkness".

Í tí sambandi var Jesper Binzer gestur í sendingini RagnarRokk. 

Sendingin kann hoyra á KVF Ljóð ella herundir.