Ørvitisprosjektið hjá Biritu og Martini Karl bleiv til ársins íverksetan

"Eg skilji væl, at nógv fólk halda, at vit eru ør, og at hetta er eitt ørvitisprosjekt."

Tað viðgekk Birita Dalsgaard Olsen, tá hon og maðurin, Martin Karl Olsen, í 2018 lótu eina kaffistovu upp í gamla og fallkomna handilsbygningini á Mølini í Skálavík. 

Mølin hevði verið í familjuni hjá Biritu í fýra ættarlið, og hon helt tað vera synd at síggja, at eyðkendi og søguligi guli bygningurin forfórst.

Tey keyptu Mølina frá mammubeiggja Biritu, Bjarna, við tí máli at blása nýtt lív í Mølina, ið skuldi gerast til ein ferðavinnudepil fyri Sandoynna við hotelli og øðrum virksemi. 

Ársins íverkseti

Í dag, skjótt átta ár seinni, er tað eingin, ið heldur Biritu og Martin Karl vera ør, og at dreymurin um at gera Mølina til ein ferðavinnudepil vera eitt ørvitisprosjekt. 

Fríggjadagin í farnu viku bleiv Caféin á Mølini kosin ársins íverkseti. Í grundgevingini stóð:

Fyritøkan, ið er ársins íverkseti, húsast í søguligum umhvørvi har vinna og handil hevur verið í fleiri ættarlið. Úr hesum søguliga stað í hjartanum á einari føroyskari bygd er sprottin ein fyritøka, ið sambindir føroyskt gestablídni og fyritakssemi í eitt fyrsta floks tilboð, ið bjóðar seg fram til føroyingar og til ferðafólk úr øllum heraðshornum.

Dagur og vika gjørdi í 2018 eina longri reportasju um Mølini í Skálavík og stóra dreymin, ið Birita og Martin Karl høvdu fyri staðið, hóast avbjóðingarnar vóru nógvar og stórar, tá tey fóru til verka.