Annika má víkja fyri Gyltu

Annika Fríðheim Petersen stóð fyri kanska besta føroyska avrikinum í tapinum fyri Montenegro í fyrsta umfari av HM-kappingini mikukvøldið.

Tað helt í øllum førum Ingi Olsen, sum gav royndasta føroyska málverjanum fýra av fimm stjørnum, eftir at hon hevði bjargað 42 prosent av skotunum, sum komu, meðan hon stóð í føroyska málinum. 

LES EISINI: Undirhondin: Ingi Olsen metir um spælaraavrikini móti Montenegro

Tí er tað kanska eitt sindur óvæntað, at hon má víkja á dómaraseðlinum fyri blaðungu Gyltu á Neystabø, sum er við til endaspæl fyri fyrstu ferð. 

Annika Fríðheim Petersen kom inn miðskeiðis í fyrra hálvleiki ímóti Montenegro, og við fleiri góðum bjargingum helt hon Føroyum inni í dystinum

Maria Halsdóttir Weyhe sat uttanfyri seinast, men hon tekur í kvøld plássið hjá Mariannu G. Eystberg ímillum føroysku bakspælararnar. Tær hava báðar vunnið sær pláss í HM-hópinum eftir fleiri ár uttanfyri.