Fer aftur í tingið at bjarga fosturtøkulógini

Fosturtøkulógin er orsøkin til, at Súsanna Bertholdsen fer úr landsstýrinum og aftur í tingið.

Hon skrivar á sínum Facebook-vanga, at hon hevur biðið um at verða loyst úr sessinum sum landsstýriskvinna, tí hon heldur tað vera sína skyldu at vera við til at dagføra ein ótíðarhóskandi lóg,  so avgerðarrætturin verður fluttur frá læknanum yvir til kvinnuna.

- Eg kann snøgt sagt ikki standa uttanfyri og hyggja at og vita, at tað er vandi fyri, at uppskotið fellur, skrivar hon.

- Nú fari eg aftur í Løgtingið fyri at standa undir liðini á øllum teimum, sum í mong áratíggju hava stríðst fyri og framvegis stríðast fyri, at kvinnan skal fáa ræðisrætt yvir egnum kroppi, skrivar Súsanna Bertholdsen.