Hava møguleika at siga sína hugsan um mannarættindi í Føroyum

Nú hava fólk og felagsskapir møguleika at siga sína hugsan um mannarættindi í Føroyum.

Síðst í januar næsta ár skulu Føroyar lata Sameindu tjóðum yvirskipaða frágreiðing um mannarættindastøðuna í Føroyum. 

Áhugafelagsskapir og almenningurin kunnu í tí sambandi senda Uttanríkistænastuni hjá landsstýrinum 
hoyringarskriv um mannarættindastøðuna í Føroyum og møguligar avbjóðingar hjá henni.

Hoyringarskrivini verða nýtt sum íkast til føroysku frágreiðingina, sum verður latin ST.

Fyrsta frágreiðingin kom í 2011

Danmark skal saman við Føroyum og Grønlandi lata frágreiðing, sum lýsir mannarættindastøðuna í kongsríkinum. 

Føroyar lótu saman við Danmark og Grønlandi sína fyrstu frágreiðing av hesum slagi í 2011. 

Hetta er fjórða frágreiðingin, sum nú skal gerast.

Freistin at koma við hoyringarskrivi er mánadagin 15. desember.