Vilja hava føðideild aftur á Suðuroyar sjúkrahúsi

Vágs kommuna fer at seta seg í samband við kommunurnar í Suðuroynni, fyri at fáa tær at taka undir við kravinum um at endurreisa føðideildina á Suðuroyar sjúkrahúsi. 

Levi R. Mørk og Marin H. Gaardlykke, býráðslimir í Vágs býráð, løgdu uppskotið fram á býráðsfundi hósdagin. Og tað var einmælt samtykt.

Tey vísa á, at síðani føðideildin á Suðuroyar sjúkrahúsi læt aftur í 2016, er talið á føddum børnum í Suðuroynni nógv minkað. 

Sambært gerðarbókini frá býráðsfundinum, vóru í 2016 51 livandi børn fødd í Suðuroynni, og síðani hevur talið av føddum børnum ligið um 30 - 40 børn um árið.

Vantandi føðideild stór avbjóðing

- Ivaleyst eru aðrar avbjóðingar ið gera, at talið á føddum børnum er minkandi, men vit meta, at stongsilin av føðideildini á Suðuroyar sjúkrahúsi er stór avbjóðing fyri búsitandi barnafamljur, ið vilja hava fleiri børn, og barnafamiljur, ið vilja seta búgv í oynni, søgdu Levi Mørk og Marin Gaardlykke í uppskotinum.

Tey mæltu til samstarv við kommunurnar, so tær saman kunnu krevja, at føðideildin á Suðuroyar sjúkrahúsi letur uppaftur, og kann verða opin, til Suðuroyartunnilin letur upp um 10 ár.

Vágs býráð samtykti einmælt at taka undir við uppskotinum, um seta seg í samband við kommunurnar í Suðuroynni um í felag at vísa á málið.