Aksel ger einki við umvalið í Runavík

Mánadagin 24. november, tríggjar dagar eftir at Løgmálaráðið hevði tikið avgerð um at lýsa umval at vera í Runavíkar Kommunu 13. januar, sendi Torbjørn Jacobsen sjey síður drúgt skriv til løgmann og landsstýrismanninum í lógar- og kommunumálum. Í skrivinum reisir hann eina røð av spurningum til avgerðina um umval.

Løgmansskrivstovan bað Løgmálaráðið svara uppá skrivið. Tað gjørdi ráðið fríggjadagin í síðstu viku. Løgmálaráðið stendur við sítt. Umval skal vera í Runavíkar Kommunu 13. januar.

Løgmaður - sum hevur yvirskipaða eftirlitið við sínum landsstýrisfólkum og skal tryggja at aðalráðini ikki fara útum sínar - hevur nú eisini svarað borgarstjóranum í Runavík.

Aksel V. Johannesen er komin til ta niðurstøðu, at einki tykist at vera at finnast at í viðgerðini hjá Løgmálaráðnum.

Tað er einki, sum bendir á, at landsstýrismaðurin hevur framt eitt lógarbrot, svarar løgmaður. Hann vil tó ikki leggja seg út í metingina og niðurstøðuna hjá Løgmálaráðnum um at kommunuvalið skal haldast av nýggjum.

-Legði løgmaður seg út í hesa meting, var hann í roynd og veru kærumyndugleiki fyri øllum avgerðum hjá landsstýriskvinnum og -monnum, og tað hevur ongantíð verið ætlanin við grein-33, stk.3 í stýrisskipanarlógini, skrivar Aksel V. Johannesen til Torbjørn Jacobsen. Løgmaður ger tí ikki meira við málið.

Grein-33, stk.3 sigur at "Løgmaður hevur eftirlit við, at hvør einstakur landsstýrismaður situr fyri sínum málsøki á lógligan og fullgóðan hátt."

Í svarskrivinum til Torbjørn Jacobsen upplýsir Aksel V. Johannesen, at málið um kommunuvalið á valstaðnum í Oyndarfirði hevur IKKI verið á dagsskrá á landsstýrisfundi. 

Løgmálaráðið heldur fast við, at umvalið í Runavíkar Kommunu skal haldast, júst soleiðis sum kommunuvalið varð hildið 12. november í 2024. 

Og Runavíkar Kommuna skal sjálv gjalda fyri tað.