Valúrslit skulu kunngerast saman við úrslitum á størri valstøðum

Sambandsflokkurin roynir nú aftur at fáa vallógina broytta, so valúrslitini í smáu valstøðunum vera almannakunngjørd saman við úrslitunum á størri valstøðum.

Flokkurin legði í gjár fram uppskot um, at løgtingið biður landsstýrið gera uppskot um at broyta vallógina.

Nøkur valstøð hava sera fáar veljarar.

Tí ber næstan til at seta navn á, hvør eigur hvørja atkvøðu, sigur Sambandsflokkurin. 

Tora ikki at atkvøða eftir sannføring

Dømi eru um fólk, sum hava sagt, at tey tora ikki at atkvøða eftir síni bestu sannføring, sigur Sambandsflokkurin.

Hetta er ein sera óheppin støða fyri demokratiið á smáplássunum, sigur Sambandsflokkurin.

Vallógin sigur, at einki valstað kann hava færri enn 10 veljarar.

Sambandsflokkurin royndi eisini at fáa vallógina broytta í 2018.