Brigitte Bardot er deyð 91 ára gomul

Brigitte Bardot hevði sína glanstíð sum sjónleikarinna, filmikon, model og sangari í fimti- og sekstiárunum. 

Nú er hon deyð, 91 ára gomul. 

Hetta skriva altjóða miðlar. 

Stríddist fyri djóravælferð

Brigitte Bardot fekk sítt altjóða gjøgnumbrot sum 22 ára gomul við filminum "Et dieu... créa la femme", sum týtt til føroyskt merkir "Og Gud skapti kvinnuna".

Sambært franska blaðnum Le Monde, so spældi Brigitte Bardot við í 56 filmum, áðrenn hon gavst í filmsvinnuni í 1973 einans 39 ára gomul. 

Brigitte Bardot

Mynd: Ritzau/Scanpix

Hon valdi tá at halga sítt lív til at stríðast fyri djóravælferð, og hevur ofta funnist at føroyingum fyri at halda grind til. Eitt nú var ein bátur hjá Sea Shepherd uppkallaður eftir Brigitte Bardot.

Júst hendan bátin kenna føroyingar væl, tí í 2015 var Sea Shepherd í Føroyum við júst bátinum "Brigitte Barot", fyri at steðga grindadrápi. Sea Shepherd hevur síðani selt bátin. 

Hon spældi eisini við í musikals og gav plátur út.