Sámal Matras: Áhugaverdar flytingar millum flokkar

Tá veljarakanningar vera gjørdar, er tað helst ov sjáldan, at hugt verður eftir hvussu tey, sum eru spurd siga at tey flyta seg í mun til seinasta val.

Í hesari seinastu veljarakanningini eru í øllum førum fleiri áhugaverd viðurskifti, sum ikki síggjast, tá mann bara hyggur eftir teimum ráu tølunum.

Eitt av viðurskiftunum er, at Javnaðarflokkurin sambært kanningini missir til Fólkaflokkin. Akkurát tað í sjálvum sær er ikki serliga vanligt, tí flokkarnir ideologiskt liggja so langt frá hvørjum. Kortini vísir kanningin, at 5. hvør av teimum, sum valdu Javnaðarflokkin til seinasta val, høvdu valt Fólkaflokkin í ár. At nøkur færri høvdu flutt frá Javnaðarflokkinum til Sambandsflokkin kemur kanska ikki so óvart á, sum tað fyrra, tí tað er minni á muni millum Javnaðarflokkin og Sambandsflokkin.

Nakað annað, sum Sámal Matras, ið er samfelagsfrøðingur og sum altíð hevur havt stóran áhuga fyri vali, valtølum og veljarakanningum, er, at tað, sum Sambandsflokkurin fær frá Javnaðarflokkinum, missir hann til Fólkaflokkin. Tað kunnu vera ymiskar orsøkir til tað, og ein kann vera, at Sambandsflokkurin var - ella var lutvíst - partur av, at uppskotið um nýggja fosturtøkulóg varð samtykt.

Men har eru eisini aðrar upplýsingar, millum annað, at kvinnuligu veljararnir, sum valdu Fólkaflokkin til seinasta val, eru trúgvari enn menninir, sum gjørdu tað sama, og at Tjóðveldi missir meira millum tey ungu enn millum tey eldru.

Trýst á pílin niðanfyri og hoyr alt innslagið, sum var í tíðindunum á nátturða.

Sámal Matras Kristiansen

Sámal Matras, samfelagsfrøðingur, hevur hugt nærri at tølunum, sum liggja til grund
fyri veljarakanningini, sum Spyr.fo gjørdi fyri KvF        Mynd: Hilmar Jan Hansen

Tað, sum varð sent í tíðindunum í kvøld var bara ein partur av einari drúgvari samrøðu. 

Um tú hevur hug at hoyra alla ta samrøðuna, so kanst tú trýsta á pílin niðanfyri her: