Starvsstovan skal sleppa at geva sekt fyri brot á djóravælferðarlógina

Heilsufrøðiliga starvsstovan skal fáa loyvi til at geva sektir fyri at bróta djóravælferðarlógina og lógina um at flyta inn og halda vandamikil djór.

Heilsufrøðiliga starvsstovan hevur biðið um, at hon kann geva sekt, um kunngerðin um at flyta inn hundar, kettur og gitnaðarevni verður brotin.

Nú hevur Tilfeingis- og vinnumálaráðið gjørt lógaruppskot um tað.

Sambært galdandi lóg kunnu hesi brot ikki avgerast við fyrisitingarligum sektaruppskoti.

Fyrst skal dómsvaldið tó siga, hvussu stórar sektirnar kunnu vera.

Sekt kann bara gevast, um tann, sum skal hava hana, játtar seg sekan og tekur við sektaruppskotinum.

Og hetta er bara galdandi fyri brot, sum ikki hava við sær hægri revsing enn sekt.