Neyvari reglur um heimablídni

Nú eru gjørdar neyvar reglur um heimablídni.

Kunngerðin frá 2010 skal broytast, so hon sigur, hvat heimablídni er.

Tilfeingis- og Vinnumálaráðið sigur, at skal talan vera um heimablídni, skal veitarin vera húsfólkið, sum býr á staðnum, har maturin verður gjørdur og borðreiddur.

Og maturin skal vera gjørdur í køkinum, sum húsfólkið brúkar dagliga.

Skrásett hjá Starvsstovuni

Tey, sum bjóða heimablídni, skulu vera skrásett hjá Heilsufrøðiligu starvsstovuni. 

Heimablídni kann ikki vera í úthúsi, fjósi, neysti ella høli, sum ikki er bústaður ella heim veitarans.

Veitarin skal á sjónligum staði í hølunum, har heimablídni er, upplýsa viðskiftafólkini um, at virksemið ikki er løggilt og ikki undir eftirliti hjá Heilsufrøðiligu starvsstovuni. 

Um lýst verður við heimablídni í sosialum miðlum ella á heimasíðu skal hetta eisini vera upplýst har, sigur Tilfeingis- og Vinnumálaráðið.