- Tíðindi, mentan og ítróttur
Ítrótturin heiðraði síni bestu í Varpinum
Ítrótturin heiðraði síni bestu í Varpinum
Jórun og Jórun, Hósvíkar Róðrarfelag, Hjalti og Djóni, U21-manslandsliðið í hondbólti, Hansina og Jústines Justinussen
Elin H. Joensen handaði Jústinusi Justinussen heiðursskjal Poul. E. Petersen fyri trúgva og drúgva tænastu í ítróttinum
Mynd: Bárður Lydersen
07.02.2026 - 21:00
Ítróttur og ítróttafólk vóru í miðdeplinum á Ítróttafagnaðinum í Varpinum í kvøld.
Ítróttasambandið lat árligu heiðurslønirnar til tey bestu og raskastu í føroyskum ítrótti farna árið, og kappingin var hørð millum tey mongu, sum vóru í uppskoti í teimum mongu bólkunum.
U21-landsliðið í hondbólti stjørnuskotið
Spenningurin var stórur kring oyggjarnar í summar, tá føroyska U21-hondbóltslandsliðið við monnum spældi seg allan vegin í HM-hálvfinaluna ímóti Portugal.
Eftir tvær ferðir longda leiktíð máttu teir kortini lúta, men reistu seg fyrimyndarliga í bronsudystinum ímóti Svøríki, sum teir vunnu sannførandi við frálíkum avriki. Fyri tað fingu teir Ítróttastjørnuskotið 2025 í kapping við Marina Danielsen (fimleikur) og Paula Joensen (inniróður).
So var kanska ikki so løgið, at venjararnir báðir, Djóni G. Joensen og Hjalti Mohr Jacobsen vórðu kosnir bestu venjararnir í fjør. Teir stýrdu ungu monnunum við tryggari hond og hava báðir staðið seg væl í føroysku kappingini í Kyndli og H71. Onnur í uppskoti vóru Durita Knudsen Poulsen (fimleikur) og Sámal Jákup Djurhuus (hondbóltur).
Afturat hesum báðum hondbóltsheiðrunum kundu fólk velja Ítróttaløtuna 2025. Við 46 prosentum av atkvøðunum var besta løtan, tá Jana Mittún tryggjaði Føroyum sigurin á Spania í HM-endaspælinum í Týsklandi.
Hjálparvenjarin á manslandsliðnum í fótbólti, Atli Gregersen, saman við U21-hondbóltslandsliðnum, sum vann HM-bronsu í summar og nú eisini Ítróttastjørnuskotið hjá ÍSF. (Mynd: Bárður Lydersen)
Jórun og Jórun vóru størstu eldsálirnar
Ítróttaeldsálirnar 2025 vórðu funnar í Klaksvík og í KÍ. Har brúka Jórun Frimannsdóttir Jacobsen og Jórun Biskupstø stóran part av síni frítíð til at taka sær av øllum teimum mongu uppgávunum, sum skulu gerast, um spælararnir skulu hava bestu treytir á vøllinum.
Tær báðar taka sær av venjingarklæðum og dystarklæðir hjá monnum og kvinnum, sum skulu vaskast, turkast, leggjast saman og leggjast upp á pláss mestsum hvønn dag. Afturat hesum baka tær kaku og gera kaffi til heimadystirnar hjá besta manslandsliðnum, sum millum annað frásøgufólk, dómarar, vaktarfólk og innkrevjarar fáa ágóðan av. Anna Dam (hondbóltur) og Andrias Sumberg (judo) vóru eisini í uppskoti.
Jórun og Jórun: Á 'heimavølli' í Varpinum í Klaksvík fingu Jórun Biskopstø og Jórun Frimannsdóttir Jacobsen heiðurin sum Ítróttaeldsálirnar 2025. (Mynd: Bárður Lydersen)
Hósvíkar Róðrarfelag fór avstað við Ítróttafelagsskapinum frammanfyri svimjifelagið Hellufoss úr Kvívík og Havnar Tennisfelag, og Hansina Nesá úr fimleikafelagnum Flog í Fuglafirði fekk heiðurin sum Sólstrálan fyri sítt stóra arbeið. Millum annað hevði hon høvuðsábyrgdina av framførsluni hjá Flog á fimleikafagnaðinum í heyst.
Jústines Justinussen fekk heiðursskjalið
Ítróttasamband Føroya letur á hvørjum ári Heiðursskjal Poul E. Petersen, og tann heiðurin fekk Jústines Justinussen fyri sítt ótroyttiliga arbeið í StÍF í ein mansaldur. Hann hevur mestsum búð í ítróttahøllini á Skála í nógv Harrans ár, og er framvegis framvið í høllini hvønn dag.
Hann hevur fylgt børnunum Leivi, Sveini og Rebekku Justinussen frá barnsbeini, og tey hava øll gjørt vart við seg í føroyskum hondbólti eftir aldarskiftið. Nú ræður tað um at taka sær av abbabørnunum, helt hann fyri á pallinum. Hann er framvegis venjari hjá U8-liðunum við dreingjum og gentum hjá StÍF.
Jústines Justinussen hevur spælt við Neistanum, har hann vann sítt einasta FM-heitið, StÍF og eisini á føroyska landsliðnum.
Er kopiera
Nýggjastu sendingar í ÚV
Nýggjastu sendingar í SV
