Netanyahu á veg til USA at hitta Trump

Ísraelski forsætisráðharrin, Benjamin Netanyahu, er á veg til Washington at hitta amerikanska forsetan, Donald Trump. 

Ørindi hansara eru at biðja Trump um at fara harðligari til verka móti Iran.

Ísrael vil, sambært AP-tíðindastovuni, hava Iran at gevast við øllum sínum arbeiði at ríka uran, landið skal minka um sína rakettverjuætlan, og eisini skal landið gevast við at stuðla hernaðarligum bólkum í økinum.

Iran hevur tó ongan áhuga í at lurta eftir ynskjunum úr Ísrael, og nú vil Netanyahu so hava hjálp úr USA.

Samráðingar eru í seinastuni farnar fram millum umboð úr USA og Iran, sum hava fundast í Oman.

Iranski uttanríkisráðharrin hevur lýst hesar samráðingar at vera "eina góða byrjan."