USA skal rinda fyri nýggjar hernaðarstøðir í Grønlandi

Tað staðfestir danski uttanríkisráðharrin, Lars Løkke Rasmussen, við tíðindastovuna Ritzau, sum grønlendska kringvarpið KNR endurgevur.

– Í tann mun amerikanarar skulu byggja amerikanskar hernaðarstøðir í Grønlandi, skulu amerikanarar sjálvsagt sjálvir fíggja hesar støðir, sigur danski uttanríkisráðharrin

Hann váttar tó samstundis, at eingin fíggingarleistur er staðfestur í avtaluni.

Tá amerikanski forsetin, Donald Trump, fríggjadagin boðaði frá at ein avtala fór at verða undirskrivað millum USA, Danmark og Grønland, ljóðaði annars, at avtalan einki fór at kosta USA fíggjarliga.

Lars Løkke Rasmussen sigur, sambært KNR at avtala skal framvegis gerast um viðurskiftini viðvíkjandi teimum tveimum nýggju hernaðarstøðunum í Grønlandi. 

Millum annað skulu atlit takast at umhvørvinum og grønlendskum livihátti og mentan.

Lars Løkke Rasmussen nevnir millum annað eisini, at USA rindar, tá arbeiði ella umvælingar verða gjørdar á Pituffik Space Base, sum í dag er einasta amerikanska hernaðarstøðin í Grønlandi.

– Tað er púra sjálvsagt, sigur Lars Løkke Rasmussen sambært KNR.

Kelda: Ritzau/KNR