Fíggjarnevndin arbeiðir framvegis við uppskotinum um Suðuroyartunnilin

Uppskotið um at fyrireika og projektera Suðuroyartunnilin er framvegis í síni tilgongd í Fíggjarnevndini, váttar forkvinnan í nevndini, Eyðgunn Samuelsen.

Fíggjarnevndin hevur eina freist at leggja álit í málinum fram mikudagin. Álitið er ikki liðugt, men nevndin arbeiðir við tí. 

Forkvinnan í nevndini hevur ikki biðið um at fáa freistina longda.

Eftir dagsskránni er næsti fundur í fíggjarnevndini hósdagin tann 19. februar.

Men tingfundir eru í morgin og mikudagin, og tað ber til hjá nevndarlimum at skriva undir eitt álit, tá tingfundir eru.  

Vanligt er, at limirnir í andstøðuflokkunum fáa álitið hjá samgongulimunum ein ella tveir dagar undan, at eitt álit verður lagt fram. 

Men seinrapartin í dag høvdu andstøðuflokkarnir framvegis ikki fingið álitið hjá samgongulimunum í málinum um Suðuroyartunnilin.