Her gongur faldurin

Vit hava hoyrt um ein fald uttan fyri Skarvanes, men hvar er hann? og hvat merkir tað fyri tunnilsarbeiðið?

Á myndini, sum er frá jarfrøðiliga frágreiðingini frá Jarðfeingi sæst hvar faldurin gongur. Hann er millum ta ljóðsareyðu og ta bláu linjuna á kortinum.

Tað er fyri tað fyrsta ikki lætt at siga, hvat tað merkir fyri tunnilsarbeiðið, tí sambært frágreiðingini hjá Jarðfeingi, vita tey ikki nóg nógv um faldin enn til at siga tað. 

Men vit vita nøkunlunda hvar hann gongur, og mett verður at man skal ígjøgnum hann tríggjar ferðir, um man fer frá Skarvanesi móti Skúgvoy, og borast skal einar 1.500 metrar í honum. 

Tilfarið í faldinum er ikki neyðtruviliga knúst grót, sum onkur vil vera við, men tað hellur upp móti 20 stigum og vit vita ikki hvussu tað reagerar, tá tað hellur.

Føroyar er sum ein lagkøka, tá tað kemur til jarðfrøði - har er basalt og so er annað bleytari tilfar ímillum - ein spurningur, sum er ósvaraður er, hvussu til dømis tað bleyta tilfarið reagerar, tá tað grótlagið hevur eitt stórt hall, sum skapar eitt trýst og vatn kemur til. Tað eru slík viðurskifti, sum eiga at vera kannaði væl, sambært endaligu frágreiðingini hjá Jarðfeingi.  

Sum tað sæst á kortinum rakar hann møguliga "Múlaleiðina" nakað - tó tað er á landi.