Tey ungu skulu ávarast um solarium

Ávaringar um at brúka solarium. 

Tað er tað, sum Heilsustýrið hevur gjørt á sosialum miðlum hesar seinastu dagarnar. Við at skriva um mýtur og fakta vísir Heilsustýrið á, hví tað er vandamikið at leggja seg í eitt solarium.

Og tað er aftur tørvur á at vísa ungum fólkum á vandarnar, ið kunnu standast av at leggja seg í eitt solarium.

- Okkara fatan er, at solarium verður meira og meira brúkt. Nýggjastu tølini um solariumvanar eru frá 2022, og har sá mann, at solarium bleiv nógv brúkt, og nú eru ábendingar um, at serliga tey ungu brúka regluliga solarium, sigur Noomi Gregersen, stjóri í Heilsustýrinum, og vísir samstundis á, at tað ikki er óvanligt hjá ungum undir 18 ár at brúka solarium, hóast lógin sigur, at tú skalt vera yvir 18 ár.

- Frá gransking vita vit, at solarium er kreftframkallandi, og byrjar tú ungur at ganga í solarium, økir tú um vandan fyri eitt nú móðurmerkjakrabba, sigur Noomi Gregersen.

Rókur Akralíð er húðlækni, og seinastu tvey árini hevur hann starvast á húðambulatoriinum á Landssjúkrahúsinum.

- Eg bleiv eitt sindur ovfarin, tá eg flutti heim til Føroya, tí her er nógvur húð og móðurmerkjakraabi í mun til veðurlagið, og har er solarium ein syndari, sigur Rókur Akralíð, sum eins og stjórin í Heilsustýrinum als ikki sær nakað gagnligt ella heilsufremjandi við solarium

- Solarium er vandamikið, tí skaðar henda í kyknunum, tá mann verður útsettur fyri uv-stráling, og tá tú verður brúnur, er tað ein verjumekanisma hjá kroppinum. Jú fleiri skaðar á húðina gjøgnum lívið, jú størri er vandin at fáa húð- og móðurmerkjakrabba, sigur Rókur Akralíð.

Í morgunsendingini forklára Rókur Akralíð og Noomi Gregersen um vandarnar, ið kunnu standast av solarium.