Tríggir stilla upp fyri 12. ferð

Teir tríggir - Jørgen Niclasen, Jacob Vestergaard og Bill Justinussen - eru tey valevnini til løgtingsvalið hesa ferð, sum hava stillað oftast upp. Hetta er 12. ferð, at teir stilla upp til løgtingsval.

Fyri fyrstu ferð eru teir á sama lista. Teir stilla allir upp fyri Fólkaflokkin, skriva valurslit.fo

Jacob Vestergaard stillaði fyrstu ferð upp fyri 42 árum síðan. Í 1984 stillaði hann upp fyri Fólkaflokkin í Suðuroyar valdømi.

Jørgen Niclasen stillaði fyrstu ferð upp til løgtingsvalið í 1988 í Vága valdømi. Hann hevur stillað upp á hvørjum løgtingsvali síðani. Hann var fyrstu ferð valdur á løgtingsvalinum í 1994, men hevði frammanundan onkutíð havt sæti í tinginum sum varamaður.

Bill Justinussen, Jacob Vestergaard og Jørgen Niclasen

Bill var í Kristiliga fólkaflokkinum

Bill Justinussen stillaði upp fyrstu ferð í 1988 fyri Kristiliga fólkaflokkin, Føroya framburðs- og fiskivinnuflokk, og hann hevur stillað upp á hvørjum løgtingsvali síðan, oftast fyri Miðflokkin, og nú fyri Fólkaflokkin.

Í Miðflokkinum stillar Jenis av Rana upp fyri 11. ferð.

Í Javnaðarflokkinum stillar Eyðgunn Samuelsen upp fyri 10. ferð. Í Sjálvstýri stillar Sámal Petur í Grund eisini upp fyri 10. ferð.

Í Tjóðveldi stillar Høgni Hoydal upp fyri 9. ferð. Og í Framsókn stillar Karlot Hergeirsson upp fyri 6. ferð.