Hondbóltsmenninir: Tríggjar ferðir eystureftir

Føroysku hondbóltsmenninir skulu tríggjar ferðir eystureftir í royndini at spæla seg til EM-endaspælið í 2028.

Føroyar endaðu nevniliga í bólki 4 saman við Ungarn, Montenegro og Kosovo til lutakastið, sum var í Lissabon hósdagin.

Mótstøðulondini vitja sjálvandi eisini Føroyar við Tjarnir í teimum seks dystunum, sum skulu spælast í undankappingini.

Langt frá ynskjunum

Hetta var ikki júst tær tjóðirnar, sum hjálparvenjarin hjá føroyska landsliðnum, Hjalti Mohr Jacobsen, ynskti sær.

Tá talan var um bestu møguleikarnar at spæla seg víðari, nevndi hann Slovenia, Litava og Estland, og legði afturat, at um undirhald og ferðing skuldu raðfestast hægst, kundu Frakland, Belgia og Finnland verið áhugaverd.

Landsliðsspælarin Allan Norðberg, sum røkir antin høgra vong ella bakk, nevndi eisini Belgia úr styrkisbólki 3, sum Føroyar vann á í báðum venjingardystunum undan EM-endaspælinum í Berlin í 2024.

Afturat teimum hevði hann hug at royna seg ímóti Íslandi í ovasta styrkisbólki - eitt krútsterkt mótstøðulið, men strandingurin hevur spælt í íslendsku deildini í nógv ár - og Luksemborg, sum eitt sindur óvæntað vann á Føroyum í undankapping her heima fyri nøkrum árum síðan.

 - Har hava vit okkurt at hevna, segði Allan Norðberg.

euro26_-_montenegro_vs_faroe_islands_flp_4628_fv.jpg

Frítekst tagging: 

Ítróttur

Hondbóltur

A-landsliðið í hondbólti

Hákun West av Teigum

Hava vunnið á balkandreingjunum

Um bólkurin ikki júst gjørdist soleiðis, sum teir báðir høvdu vónað, kunnu føroysku spælararnir kortini ugga seg við, at teir hava frálík hagtøl ímóti báðum mótstøðuliðunum av Balkan.

Í farnu EM-undankappingini vunnu Føroyar greitt á Kosovo (styrkisbólkur 4) á heimavølli, meðan sigurin á útivølli staðfesti plássið í EM-endaspælinum í januar.

Har vístu føroyingarnir seg fram ímóti Montenegro (styrkisbólkur 3) við stórsigri, og tí munnu vónirnar til dystirnar hesa ferð vera góðar. Kanska serliga til dystin við Tjarnir, har Føroyar eru sterkar, meðan montonegrinar kanska vilja vaska lemjandi EM-ósigurin av sær.

Føroyar og Ungarn, sum kom úr ovasta styrkisbólki, hava ikki spælt í nýggjari tíð. Tað verður uttan iva trupult í Budapest, men við Tjarnir er kanska ikki ógjørligt at fáa eitt líkinda úrslit burturúr.

Møguligt bólkaspæl í Lissabon

1. og 2. umfar av EM-undankappingini verða spæld í november, 3. og 4. umfar eru á skránni í mars, og í mai verður gjørt av, hvør spælir seg víðari til sjálvt endaspælið.

Eydnast tað Føroyar av verða millum tvey tey bestu ella millum fýra teir bestu trý'ararnar skal landsliðið spæla EM-bólkaspæl í Lissabon.