Løgtingið: Hesar løgtingsnevndirnar skulu viðgera hesi løgtingsmálini

Løgtingsformaðurin, Johan Dahl, hevur nú gjørt av, hvussu løgtingsmálini skulu býtast í løgtingsnevndunum.

Tað skrivar løgtingið í tíðindaskrivi.

Løgtingsmál frá løgmanni verða beind í rættarnevndina, og yvirtøkumál í uttanlandsnevndina.

Uttanríkis- og fiskivinnumál í uttanlandsnevndina og vinnunevndina.

Fíggjarnevndin skal viðgera fíggjarmál og uppskot til verklagslógir.

Vinnunevndin skal viðgera vinnumál, meðan rættarnevndin skal viðgera uppskot í útlendinga-, integratións- og kommunumálum.

Mál úr almanna- og bústaðarmálaráðnum verða beind í trivnaðarnevndina, men arbeiðsmarknaðar-, arbeiðsumhvørvis- og vanlukkutryggingarmál skulu viðgerast í rættarnevndini.

Heilsu- og orkumál skal trivnaðarnevndin viðgera, tó verða orku- og umhvørvismál og byggimál beind í vinnunevndina, og navnamál í mentanarnevndina.

Mentanarnevndin fær mentamál, meðan trivanaðarnevndin skal viðgera serforsorgarmál um børn og ung.