Hákun flúgvandi í steypasigri: "Hetta er øgiliga feitt"

Hákun West av Teigum var flúgvandi, tá Füchse Berlin tryggjaði sær týska steypagullið við stórsigri á Bergischer. 

Føroyski vongurin skeyt fimm mál fyri steðgin og legði eitt afturat í seinna hálvleiki og átti sostatt stóran leiklut í 42-33 finalusigrinum hjá høvuðsstaðarfelagnum, sum ikki hevur vunnið kappingina síðan 2014.

 - Hetta er øgiliga feitt. Hetta er nakað, sum felagið hevur roynt í øgiliga nógv ár. Her eru nógvir spælarar, sum hava spælt her í eini sjey ár og hava endiliga vunnið tað nú, segðu Hákun West av Teigum við útvarpið.

Landsliðsspælarin, sum leggur steypagullið afturat týska meistaraheitinum í fjør, var fegin og lítillátin eg egið avrik í Lanxess Arena í Køln.

 - Soleiðis er viðhvørt. Sum vongur hevur tú ikki nógv vald á, hvussu nógvar bóltar tú fært. Viðhvørt er tað seks, sjey bóltar, sum í dag, og viðhvørt eru tað ikki so nógvir, so tað er bara at taka kjansin, tá hann kemur, og tá hann kemur í eini finalu, er tað sjálvandi stuttligari, segði Hákun West av Teigum, beint eftir at gullið var komið um hálsin.

Magdeburg, sum tapti óvæntaðfyri júst Bergischer í hálvfinaluni í gjár, sær út til at fara avstað við týska meistaraheitinum hetta kappingarárið, men Füchse Berlin er í fjórðingsfinaluni í Champions League, har mótstøðuliðið verður Veszprém.

 - Vit eru í fjórðingsfinaluni, og tað er eitt heiti afturat, sum vit kunnu vinna fyri at markera okkum sum eitt topplið í Evropa og í Týsklandi, segði føroyski landsliðsvongurin.

Fjórðingsfinalurnar liggja báðu megin maánaðarskiftið, og síðan kemur uppgerð ímóti Kiel. Eftir hetta skal Hákun West av Teigum royna at spæla Føroyar til HM-endaspælið í tveimum røkkstøkk-dystum ímóti Bosnia úti 14. mai og heima 16 mai.