Runavíkar havn 24 milliónir í bruttoinntøku í fjør

Runavíkar havn hevði 23,8 milliónir krónur í bruttoinntøku í 2025, skrivar Runavíkar kommuna á heimasíðu síni.

Úreiðslurnar í fjør vóru 15,1 millión krónur, sum samanlagt gevur eitt avlop uppá 8,7 milliónir krónur. 

Bæði inntøkur og útreiðslur eru vaksnar í mun til 2024, men úrslitið er 200.000 krónur verri í 2025. Í heila tikið er úrslitið hjá Runavíkar havn bara versnað síðan 2021, tá tað var 10,1 millión krónur.

Sambært kommununi, er orsøkin til lakara úrslitið avleiðingar av koronufarsóttini, lutvísi havnarstongsilin fyri skip úr Russlandi, og íløgur, sum eru framdar yvir raksturin. 

Størri inntøkur frá øðrum virksemi

Hinvegin hevur annað virksemi økt um inntøkurnar, og tí er ikki óhugsandi, at ferðslan og virksemið hjá Runavíkar havn fer at økjast, eitt nú, tá nýggja turrdokkin á Skála verður liðug, og tá nýggi orkudepilin hjá Effo í Søldarfirði verður liðugur.

Samanteljing vísir, at síðani Runavíkar og Skála kommunur løgdu saman fyri 21 árum síðan, hevur Runavíkar havn havt 313 mió. krónur í samlaðari inntøku og 126 milliónir krónur í avlopi, skrivar Runavíkar kommuna.

Eitt virkisøki, sum er nógv vaksið hjá Runavíkar Havn, er ferðamannaskipini, sum fara at økjast munandi í ár.

Í fjør vitjaðu 21 ferðamannaskip havnir í Runavíkar kommunu, men í ár verður tað talið í øllum førum 33, skrivar kommunan.