Heimsmetið hjá Sawe er ótrúligt

Ein tími 59 minuttir og 30 sekund.

So skjótt rann Sabastian Sawe maratonteinin, tá hann um vikuskiftið luttók í London maraton. Við hesi tíðini setti Sawe nýtt heimsmet.

Føroyska metið í maraton eigur Julian Gregersen úr Klaksvík við tíðini tveir tímar 21 minuttir og 30 sekund.

Sambært honum er nýggja heimsmetið í maraton næstan óveruligt.

- At síggja Sawe seta ferðina upp skjótari og skjótari var heilt ótrúligt, og tað var nakað heilt serligt at hyggja at, sigur Julian Gregersen, sum fylgdi við í renningini í beinleiðis sjónvarpi.

Sambært Julian Gregersen er hetta ein heilt serstøk hending.

- Hetta er kempi stórt, at hann slær tveir tímar markið, sum nógvir ítróttagranskarar fyrr hava sagt er ómøguligt, sigur Julian Gregersen og leggur afturat, at hetta fær maratonrennarar at trúgva uppá, at teir eisini kunnu forbetra sínar tíðir munandi.

Í morgunsendingini greiðir Julian Gregersen frá maratonrenning og nýggja heimsmetinum, umframt at hann roynir at renna við Sawe-ferð á rennibandi.