USA tekur 5.000 herfólk úr Týsklandi

Amerikanski verjumálaráðharrin, Pete Hegseth, hevur gjørt av, at 5.000 av teimum 36.000 herfólkunum, sum amerikanarar hava í Týsklandi, skulu takast heim.

Tað hendir eftir eina ósemju millum amerikanska forsetan, Donal Trump, og týska samveldiskanslaran, Friedrich Merz, um kríggið í Iran. Friedrich Merz segði, at hann ikki heldur, at amerikanarar hava nakra ætlan í Iran yvirhøvur, og hann dugdi í grundini ikki at síggja, hvussu amerikanarar skuldu sleppa úr aftur Iran.

Og hann heldur samstundis, at iranar hava eyðmýkt amerikanarar við ikki at samráðast, hóast teir hava latið sum um.

Sambandið millum USA og Evropa hevur verið versnandi síðan stjórnin hjá Donald Trump tók við í fjør. Amerikanski forsetin hevur verið misnøgdur við handilsavtalurnar, hann hevur verið misnøgdur við NATO og seinast hevur hann eisini verið misnøgdur við at evropeisku sameindu hjá USA ikki vildu senda herdeildir til Hormuzsundið. Serliga hevur tað rakt Týskland og Frakland, men nú eisini Italia og Spania, har Italia ikki er nøkur hjálp og har Spania sambært amerikanska forsetanum er ræðuligt.

Trýst á pílin niðanfyri og hoyr alt innslagið, sum var í tíðindunum á middegi.