Aftur til stovnsleiðarar eftir 11 árum við eindarleiðarum

Heilsu- og umsorganartænastan í Tórshavnar kommunu fer nú aftur at hava stovnsleiðarar eftir at hava havt eindarleiðarar í 11 ár.

Fyrst og fremst broytingin í fólkasamansetingini krevur broytingar í bygnaðinum í heilsu- og umsorganartænastuni, sigur kommunan.

Síðan 2015, tá eldraøkið var flutt frá landinum til kommunurnar at reka og umsita, eru tey, sum eru 80 ár ella eldri, vorðin lutfalsliga nógv fleiri í Tórshavnar kommunu.

Og alt bendir á, at hetta talið fer at hækka uppaftur meira komandi árini.

Tey, sum vóru 80 ella eldri, vóru 760 í 2015.

Í fjør vóru tey 1059. 

Framrokningar siga, at tey vera 1618 í 2035.

Seinasta bygnaðarbroyting í 2014

Verandi bygnaður í heilsu- og umsorganartænastuni er frá 2014. 

Tá var farið frá at hava røktarheimsleiðarar á hvørjum stovni, men eindarleiðarar vórðu settir fyri okkurt um tríggjar stovnar hvør.

Kommunan sigur, at skipanin við eindarleiðarum hevur riggað væl í sambandi við til dømis fíggjarligt skynsemi og at skipa eins tilboð og tænastur til fólk. 

Arbeiðsbyrðan nógv vaksin

Men arbeiðsbyrðan hjá eindarleiðarunum er vaksin nógv seinastu árini.

Starvsfólk hava gjørt vart við, at eindarleiðslan viðhvørt hevur verið ov langt burturi frá gerandisdegnum á deildunum.

Tað kom fram í nøgdsemis- og trivnaðarkanning í 2022.

244 búpláss til gomul fólk eru í Tórshavnar kommunu.