Ikki um pengar men um manning

Ósemjan millum íslendska sjómannafelagið og Eimskip er ikki um pengar, men um manning.

Tað sigur Bergur Þorkelsson, formaður í sjómannafelagnum, við Morgunblaðið.

Hann sigur, at felagið vil hava Eimskip at gevast við at manna skipini við fólki úr fátækum londum, sum, sambært honum, fáa fimm ferðir minni hýru enn íslendingarnir.

Og íslendingar vera koyrdir í land, so fólk úr fátækum londum sleppa at manna skipini.

Verkfallið hjá dekkarum og bátsformonnnum á skipunum Brúarfossi, Dettifossi og Selfossi byrjaði í gjár.

Tey trý skipini sigla øll til Føroya.

Verkfallið er ikki tíðaravmarkað.

Eimskip siga, at tey hava roynt at bera so í bandi, at viðskiftafólkini vera so lítið rakt sum gjørligt. 

Beint nú hevur semingsstovnurin ikki boðað til fundar.