Føroyar skutlaðu skotar eftir frálíkan fimmsettara

Føroysku flogbóltsmenninir hava spælt seg í finaluna í SCA-kappingini í Norðurírlandi.

Teir tryggjaðu sær plássið við frálíkum sigri í jøvnum og spennandi fimmsettara ímóti Skotlandi í hálvfinaluni leygarkvøldið.

Skotland var nærum 40 stig frammanfyri Føroyar á styrkilistanum undan dystinum, men munurin sást á ongan hátt á vøllinum, har liðini skiftust um at vinna sett.

Øll settini vóru rættiliga jøvn, og sum dysturin leið sást hetta aftur hjá fleiri spælarum, sum stríddust við sinadrátt og aðrar smávegis trupulleikar.

Í javnbrótaranum sá eina løtu út til, at Skotland kanska hevði eitt sindur meir eftir í tanganum, men við einum frálíkum avriki síðstu løtuna eydnaðist tað føroyingunum at vinna 15-12 og tryggjað sær finaluplássið.

Gleðin var stórt hjá teimum hvítu, sum spæla ímóti San Marino um gullið sunnudagin seinnapartin.

SCA-kapping, Norðurírland

Føroyar - Skotland 3-2 (25-18, 23-25, 25-23, 20-25, 15-12)