Smyril ger eykatúr á jóansøku

Smyril ger ein túr aftrat millum Havnina og Suðuroynna leygardagin á jóansøku.

Upprunaliga skuldi Smyril bara sigla ein túr suður á óansøku leygardagin, men skjótt var túrurin útseldur. 

Nú boðar Strandferðslan frá, at ein túrur verður sigldur aftrat. Tó ikki suður á Vág, har Jóansøkan verður hildin í ár, men á Krambatanga, har eyka bussar flyta fólk suður til Vágs.

Sambært dagførdu ferðaætlanini fer Smyril av Tvøroyri klokkan seks leygarmorgunin.

Siglt verður úr Havn suður til Vágs klokkan trý korter til níggju. Síðani fer Smyril av Vági norðureftir klokkan trý seinnapartin, og av Havnini suður á Krambatanga klokkan trý korter til sjey leygarkvøldið.

Síðsti túrur leygardagin verður av Krambatanga norður til Havnar klokkan hálvgum tíggju leygarkvøldið.

Dagførda ferðaætlanin í samband við Jóansøku er á heimasíðuni hjá Strandferðsluni.