Frítekst tagging:
- Tíðindi, mentan og ítróttur
Belgia varpaði USA og Balogun út
Belgia varpaði USA og Balogun út
Folarin Balogun, sum byrjaði inni fyri USA eftir strikað leikbann, munaði lítið, tá Belgia varpaði vertstjóðina út úr heimsmeistarakappingini við stórsigri í Seattle
Belgia skorar til 3-1 ímóti og varpar USA út úr heimsmeistarakappingini
Mynd: Blake Dahlin/Reuters/Ritzau Scanpix
07.07.2026 - 10:19
Folarin Balogun byrjaði inni fyri USA í áttandapartsfinaluni í gjár, men munaði lítið, tá Belgia varpaði vertstjóðina út úr heimsmeistarakappingini við stórsigri í Seattle.
Fifa hevði strikað leikbannið hjá framherjanum, sum varð útvístur ímóti Bosnia Hersegovina í undanfarna umfarinum, eftir at amerikanski forsetin Donald Trump hevði tosað við Fifa-forsetan Gianni Infantino.
LES EISINI: USA-stjørna sleppur á vøllin eftir óvanliga Fifa-avgerð
Altjóða fótbóltssamgongan avsannar, at hetta var orsøkin til, at leikbannið varð strikað, men hevur fingið hvassar atfinningar frá millum annað Uefa fyri at seta trúvirði hjá kappingini í vanda.
Folarin Balogun fekk leikbann sítt strikað av Fifa, men hann munaði lítið ímóti Belgia, sum vann stórsigur. (Mynd: Kevin Ng/Reuters/Ritzau Scanpix)
Belgia omaná
Belgiska fótbóltssambandið hótti eisini við at kæra, um Balogun spældi dystin, men á vøllinum vóru menninir hjá Rudi Garcia, sum hevði sett Kevin De Bruyne og Jeremy Doku á beinkin, topptendraðir frá byrjan.
Charles De Ketelaere legði Belgia framum longu í 9. minutti, og hóast Malik Tillman javnaði, vóru evropeararnir skjótt á odda aftur. Hans Vanaken økti til 3-1, tá ein lítil tími var spældur, og í yvirtíðini setti innskifti puntum Romelu Lukaku.
Overturn this. 🧏♂️ #USABEL pic.twitter.com/KcBAJp3Z7d
— Belgian Red Devils (@BelRedDevils) July 7, 2026
Belgisku spælararnir dansaðu sum Trump við hornaflaggið, og belgiska fótbóltssambandið skrivaði "Overturn this" á sosiala miðlinum X. Dysturin er spældur, men seinasta orðið um Balogun-málið er neyvan sagt.
Ronaldo takkaði fyri seg í tapi fyri Spania
Um dysturin ímillum USA og Belgia í stóran mun snúði seg um ein spælara, varð tað sama partvís galdandi, tá Portugal og Cristiano Ronaldo fóru á vøllin ímóti Spania í Texas.
Undan dystinum hevði legendariski framherjin boðað frá, at hendan heimsmeistarakappingin varð hansara seinasta, og eftir ein lakan dyst, sum innskifti Mikel Merino avgjørdi í yvirtíðini, fór Ronaldo av størsta pallinum fyri seinastu ferð við tárum í eygunum.
. Eg havi givið alt. Eg havi vunnið tríggjar kappingar við Portugal. EM í 2016 er á sama stigið sum HM, segði Ronaldo, sum skoraði 11 mál upp á 27 dystir í HM-endaspølunum í 2006, 2010, 2014, 2018, 2022 og 2026.
Cristiano Ronaldo takkaði fyri seg í HM-høpi við táravættum eygum, eftir at Spania hevði vunnið 1-0 í áttandapartsfinaluni í gjárkvøldi. (Mynd: Jerome Miron/Reuters/Ritzau Scanpix)
Messi ímóti Salah
Seinastu áttandapartsfinalurnar verða spældar í dag. Lionel Messi og Argentina skulu royna at spæla seg framvið Egyptalandi og Mohamed Salah í seinnapartsdystinum í Atlanta.
Bæði londini spældu 120 minuttir í sekstandapartsfinalunum ímóti ávíkavist Grønhøvdaoyggjum og Avstralia, og talan kann skjótt gerast um enn ein harðan og drúgvan dyst.
Í kvøld spæla Sveis og Kolumbia í Vancouver.
Er kopiera
Nýggjastu sendingar í ÚV
Nýggjastu sendingar í SV
