Leikbann strikað: USA-stjørna sleppur á vøllin eftir óvanliga Fifa-avgerð

Fifa hevur strikað leikbannið hjá USA-framherjanum Folarin Balogun, sum tískil kann spæla í áttandapartsfinaluni ímóti Belgia týsnáttina.

Balogun fekk beinleiðis reytt kort í seinasta umfari, tá vertstjóðin vann 2-0 á Bosnia Hersegovina. Tað merkir vanliga automatiskt leikbann í minst ein dyst, men soleiðis verður eftir øllum at døma ikki í hesum førum.

Í gjár skrivaði The Athletic, at leikbannið hjá framherjanum er strikað sambært grein 27 í Fifa-reglugerðini.

Bert eina ferð fyrr er eitt leikbann strikað undir einum HM-endaspæli. Tað var í 1962, tá Garrincha, sum varð útvístur í hálvfinaluni ímóti Kili, kortini slapp at spæla í finaluni ímóti táverandi Kekkoslovakia.

Tá var reglan um automatiskt leikbann ikki í gildi.

20260706-021549-6-3013x2000ma.jpg

Frítekst tagging: 

Ítróttur

Fótbóltir

HM í fótbólti

HM í USA

donald trump

Gianni Infantino

Trump ringdi til Infantino

Sambært AP, New York Times og The Athletic kemur avgerðin hjá Fifa, eftir at amerikanski forsetin Donald Trump hevur tosað við Fifa-forsetan Gianni Infantino um leikbannið einaferð í síðstu viku.

Harumframt bað amerikanski uttanríkisráðharrin Marco Rubio um kærumøguleikar á tíðindafundi hósdagin, og løgfrøðingar hjá stjórnini eisini hava arbeitt við málinum.

Donald Trump takkaði Fifa fyri avgerðina á egna miðli sínum, Truth Social: - Eg takki Fifa fyri at hava tikið røttu avgerðina og steðga hesum órættvísi, skrivaði forsetin. 

Í desember gav Fifa Donald Trump sonevnda friðarprísin, sum fótbóltssamgongan læt fyri fyrstu ferð.

Meðan amerikanski landsliðshópurin fegnast um avgerðina hjá Fifa, finst belgiska fótbóltssambandið hvassliga at altjóða fótbóltssamgonguni, sum sambært RBFA ger beinleiðis ímóti egnari reglugerð.

belgia.jpg

Frítekst tagging: 

Ítróttur

Fótbóltur

HM í fótbólti

belgia

 - Eg visti ikki, at 5. juli var tað sama sum 1. apríl til heimsmeistarakappingina. Tað er 1. apríl, segði belgiski venjarin Rudi Garcia á tíðindafundi í gjár.

Eisini hevur norski venjarin, Ståle Solbakken, funnist at avgerðini hjá altjóða fótbóltssamgonguni.

 - Hetta er eitt stórt mistak frá Fifa. Eg haldi ikki, avgerðin er røtt. Hann fekk reytt kort, og VAR gav honum reytt kort. Hann varð útvístur. Tað merkir, at tú hevur leikbann í ein dyst. Hvat við næsta reyða kortinum. Hvat hendir so? Verður tað ein ella onnur nevnd, sum skal strika tað kortið, segði norski landsliðsvenjarin.

Dysturin millum Belgia og USA verður týsnáttina klokkan eitt á Lumen Field í Seattle. Sum støðan er í løtuni, verður Folarin Balogun á dómaraseðlinum.