Oljuprísurin hækkar støðugt

Oljuprísurin hevur ikki verið so høgur í fýra vikur,  eftir at USA aftur er farið at leypa Iran og ávarar um at stongja iranskar havnir.

Prísurin á norðsjóvarolju hækkaði í nátt 1,68 dollarar, upp í 84,98 dollarar tunnuna. Vøksturin er tvey prosent.

Amerikanska lættoljan hækkaði 2,1 prosent, ella 1,65 dollarar, og kostar nú 79,79 dollarar tunnuna.

Hetta er tað mesta, síðani londini bæði 17. juni skrivaðu undir ætlanarskriv, sum skuldi leggja grundarlagið undir at enda kríggið.

Hormuzsundið

Steingja iranskar havnir í kvøld

Amerikanski stongsilin móti iranskum havnum og iransku strondini verður settur í gildi í kvøld klokkan níggju okkara tíð, upplýsir Joint Maritime Information Center, sum amerikanska sjóverjan stendur á odda fyri.

Tað skrivar tíðindastovan Reuters.

Amerikanski forsetin, Donald Trump, segði í gjár, at USA "nú verður kent sum tann, ið ansar eftir Hormuzsundinum".

Hann skrivaði á egna miðli sínum, at Hormuzsundið er opið, og verður nú opið fyri øllum - uttan iranskum skipum og teimum, sum hava handilssamband við Iran.

Iran hevur hinvegin sagt, at landið fer ikki at loyva USA at leggja seg út í umsitingina av sundinum.

- Landið fer at standa ímóti øllum amerikonskum royndum at skipa ferðsluna uttanum iranska herinum, stendur í fráboðan frá iransku verjuleiðsluni Khatam al-Anbiya.