Lítil undirtøka fyri fleiri fiskidøgum

Ikki er stór undirtøka í vinnuni fyri uppskotinum hjá Bárði á Steig Nielsen, landsstýrismanni, um at geva bátunum í bólki 5B 750 fiskidagar aftrat.

Kringvarpið skilir, at eingin í Fiskivinnuráðnum tekur yvirskipað undir við uppskotinum.

Men grundgevingarnar hjá limunum eru ymiskar.

Í Fiskivinnuráðnum eru Ráfiskaseljarafelagið, Ráfiskakeyparafelagið, Reiðarafelagið, Skipara- og Navigatørfelagið, Maskinmeistarafelagið, Fiskimannafelagið, Meginfelag útróðrarmanna og feløgini hjá arbeiðsfólki á fiskavirkjum.

Jóanna Djurhuus, deildarleiðari í Vinnumálaráðnum, er forkvinna.

Lógin um Fiskivinnuráðið sigur, at øll týðandi fiskivinnumál og øll uppskot um lógir og kunngerðir skulu leggjast fyri Fiskivinnuráðið til ummælis. 

Freistin at ummæla uppskotið um fleiri fiskidagar var til 25. juli.

Innlit fæst ikki í hoyringarskrivini, tí talan er um lóggávumál, sum ikki er lagt fram í tinginum, sigur Uttanríkis- og Fiskimálaráðið og vísir til innlitslógina.

Í gjár vóru 48 fiskidagar eftir í bólki 5B.