50 fólk flutt við franskari fregatt í venjing á Gøtuvík

Umleið 50 fólk úr Eysturkommunu vóru í dag við í einari venjing hjá fronsku fregattini Auvergne á Gøtuvík.

Fólkini vóru statistar í venjingini, har endamálið er at venja herfólk í at tryggja eitt øki og flyta sivilfólk burtur úr einari vandastøðu. Tey 50 fólkini vórðu flutt umborð á fregattina, sum síðani sigldi tey til Havnar.

Árant Hansen úr Norðragøtu var ein teirra, sum luttók. Hann sigur, at venjingin gav teimum innlit í, hvussu tað kann vera at verða fluttur burtur í sambandi við eina vanlukku ella kreppustøðu.

Franska fregattin Auvergne er í løtuni undir Nato-leiðslu í norðurhøvum. Sambært næsthægsta yvirmanninum umborð er endamálið við venjingini at venja manningina til ymiskar uppgávur, sum kunnu gerast neyðugar í einari kreppustøðu.

Í ímyndaðu støðuni í venjingini var ein oyggj vorðin eitt sokallað miseydnað ríki, og uppgávan hjá hermegini var at tryggja økið og flyta fólk haðani.

Hoyr innslag, tá fregattin var komin til Havnar eftir venjingina: