Meiri svartkjaftur og meiri sild næsta ár

Strandarlondini eru vorðin samd um kvoturnar fyri svartkjaft og sild í 2027.

Tað boðar norska vinnu- og fiskimálaráðið frá í tíðindaskrivi. 

Heildarkvotan fyri svartkjaft er ein millión og 64.191 tons.

Fyri sildina er heildarkvotan 588.004 tons.

Londini hava gjørt eftir tilmælunum hjá fiskifrøðingunum í ICES.

Sambært verandi býti verður føroyska svartkjaftakvotan tí sløk 380.000 tons, 75.000 tons meira enn í ár.

Sildarkvotan verður sløk 60.000 tons, góð 5.000 tons meira enn í ár.

Í næstu viku fara strandarlondini Føroyar, Bretland, ES, Grønland, Ísland og Noreg at samráðast um makrel.