Løgmaður: Hópyvirvøkan er væl avvigað

Beinir Johannesen, løgmaður, ætlar at seta eina danska kunngerð um logning í gildi í Føroyum. Hon hevur við sær, at telefeløgini skulu skráseta upplýsingar, sum kunnu eyðmerkja føroyingar á internetinum, og goyma upplýsingarnar í eitt ár.

Endamálið er millum annað at gera tað møguligt hjá politinum at knýta eina IP-adressu at einum ávísum brúkara í sambandi við kanningar av talgildum brotsverkum. Løgmaður vísir serliga á talgild kynslig brotsverk og fíggjarlig brotsverk.

Dátueftirlitið hevur kallað uppskotið hópyvirvøku. Løgmaður avnoktar ikki hesa lýsingina, men heldur, at skipanin er væl avvigað, tí ein dómari skal geva politinum loyvi at fáa atgongd til upplýsingarnar.

Politiið hevur sambært løgmanni ikki lagt fram tøl, sum vísa, hvussu stóran mun nýggja skipanin væntandi fer at gera fyri kanningararbeiðið.

Hoyr innslag her: