Silfá og Ása tryggjaðu sær føroyameistaraheitið

Ása Bárðardóttir og Silfá vunnu næstseinastu FM-kappingina í tvíspori fyri vaksin, og tryggjaðu sær samstundis føroyameistaraheitið, nú bert fimta kappingin er eftir at ríða.

Silfá við Ásu Bárðardóttir á baki kom um mállinjuna í Havnardali við múlanum frammanfyri Braga við Barbaru Reynheim Mouritsen. Vinnaratíðin var 30,29, meðan silvurvinnararnir komu á mál bert 0,22 sekund seinni.

Nummar trý var Thor við Hannu Sigtórsdóttir Petersen á baki.

Kambur við Brynju Lützen á baki vann tvíspor fyri ung. Kiljan og Simona Tornby endaðu nummar tvey, men tey hava somikið nógv stig samanlagt, at tey ikki kunnu takast í FM-kappingini.

Í næstbesta flokki hjá teimum vaksnu komu Spirit og Drós Andriasardóttir fremst á mál, Brúni við Jóannesi Debes á baki vann skeiðið og Brynjar og Regin Johannesen vunnu tøltið.

Seinasta kappríðingin í hesum kappingarárinum verður í Vágum leygardagin 29. august.