- Tað liggur ein kraft í at tora at vera erligur

– Eg klári ikki so væl glæstrimyndina. Eg haldi ofta, at tað liggur ein ávís kraft í at tora at vera erligur og djarvur.

Hóskvøldið fekk Suni Merkistein virðisløn M.A. Jacobsen fyri annað mentanarligt avrik. Í grundgevingini fyri virðislønina verður millum annað víst á, at Suni Merkistein við sendingum sínum hevur varpað ljós á søguligar, mentanarligar og listarligar varðar í føroyska samfelagnum.

Sjálvur sigur hann, at hann leitar eftir søgum, har okkurt hendir ella broytist, ofta søgum um fólk, sum hava avrikað nakað, havt eina visión ella roynt at fremja okkurt.

Eitt eyðkenni í fleiri av dokumentarunum er, at persónarnir ikki bara verða lýstir frá teirri vøkru síðuni, tí tað vísir okkum menniskju, sum vit eru.

Suni Merkistein er sjálvlærdur. Hann byrjaði longu sum 15 ára gamal í barnaútvarpinum og hevur verið í føstum starvi í Kringvarpinum síðan 1990. Síðani hevur hann arbeitt bæði við ítrótti, útvarpssendingum og einum longum røðum av sjónvarpsdokumentarum.

Málið og frásøguhátturin verða eisini tikin fram í grundgevingini fyri virðislønina. Suni Merkistein sigur, at áhugin fyri føroyskum máli og bókmentum byrjaði tíðliga. Sum ungur las hann nógv føroyskan skaldskap, og seinni vóru millum aðrar Jógvan Arge og Niels Juel Arge fyrimyndir til útvarpsfrásøgn.

Hóast nógv er komið úr hondum, er seinasta søgan langt frá søgd.

– Eg havi ofta gingið við einum ótta fyri, at ein dagur kemur, tá eg ikki havi fleiri søgur at fortelja. Men so gongur ein tíð, og so kemur ein onnur. Eg havi nokk so lætt við at verða hugtikin av onkrum og gerast forvitin og kava niður í tað, sigur Suni Merkistein.

Hoyr alla samrøðuna við Suna Merkistein.