Høvuðsstaðurin tyngir Landssjúkrahúsið

Bíðilistarnir at fáa røktarpláss í Tórshavnar kommunu eru eisini ein byrða hjá Landssjúkrahúsinum. Støðan higartil í ár er verri enn undanfarin ár.

Á Suðuroyar sjúkrahúsi hava eingir trupulleikar verið av liðugt viðgjørdum sjúklingum í ár.

Á Klaksvíkar sjúkrahúsi hava tey havt liðugt viðgjørdar sjúklingar í tilsamans 406 dagar. 70 prosent av teimum hoyra til norðoyaøkið.

Tríggir liðugt viðgjørdir sjúklingar, sum eru úr Tórshavnar kommunu, eru sendir av Landssjúkrahúsinum til Klaksvíkar.

Vit ætlaðu at tosa við Heðin Mortensen, borgarstjóra í Havn, hvussu kommunan raðfestir eldraøkið, men tað hevur ikki eydnast at fáa svar frá Heðini Mortensen í dag.