Clearing: Aksel sigur ja, Bárður sigur nei

Hava Kristin Michelsen í Javnaðarflokkinum og Magni Laksafoss í Sambandsflokkinum clearað hvør annan, soleiðis at Magni Laksafoss fer ikki at atkvøða ímóti uppskotinum um fiskivinnunýskipan.

Tað hevur verið stóri spurningurin í tinginum í dag, nú Kristin Michelsen er farin av landinum. Hann hevur ikki biðið um farloyvi úr tinginum, meðan hann er burturstaddur.

Bárður Nielsen, formaður í Sambandsflokkinum, sigur, at hann hevur onga avtalu gjørt við Magna Laksafoss, sum eisini er næstformaður í Sambandsflokkinum, um at Magni Laksafoss og Kristin Michelsen skulu cleara hvør annan í sambandvi við atkvøðugreiðsluna um fiskivinnunýskipanina.

Men Aksel V. Johannesen, løgmaður og formaður í Javnaðarflokkinum, sigur, at ein avtala um clearing er gjørd.

Orðaskiftið við 2. viðgerð byrjaði eftir klokkan 10 fyrrapartin, og tað heldur fram.