Sannlíkt at vit eisini strika summartíð

Tað sigur Aksel V. Johannesen, løgmaður, nú ES-tingið og fleiri ES-lond ætla at sleppa sær av við summartíð.

Ein meiriluti í ES tinginum hevur samtykt, at frá 2021 skulu londini í ES sjálvi gera av, um tey vilja hava vetrartíð ella summartíð, tað er somu tíð alt árið.

Men í løtuni bendir tó lítið á, at ráðharraráðið í ES fer at taka undir við samtyktini í tinginum.

ES-nevndin skeyt í fjør upp at taka skipanina við vetrartíð og summartíð av. Tað varð gjørt eftir eina almenna hoyring, har 4,6 milliónir fólk í ES vóru við. 

84 prosent svaraðu, at tey vilja hava somu tíð alt árið. Verandi kunngerð um vetrartíð og summartíð í Føroyum er galdandi til og við 2021.

Seinasta sunnunátt í mars verður klokkan flutt ein tíma fram, og hon verður flutt ein tíma aftur seinastu sunnunátt í oktober.