Framherji hevur tilknýti til ivasom feløg á Kypros

Tvey feløg á Kypros, sum bæði eita Esja – eitt Esja Shipping og eitt Esja Seafood, hava tilknýti til Føroya.  

Í sendingini Teir Ómettiligu 1 kom fram, at Esja Shipping var tað felagið, sum stovnaði trý feløg i Føroyum, Tindhólm, Skombrus og Harengus, har av Tindhólmur er blivið nýtt av Samherja, til at sleppa undan skatti í Namibia, sambært Jóhannesi Stefanssyni, varsskógvara og fyrrverandi stjóra fyri virkseminum hjá Samherja í Namibia.

Hitt felagið, Esja Seafood, er sambært Jóhannes Stefanssyni nýtt til ivasamt virksemi fyri at flyta pengar úr einum landið til eitt annað. Nýggj skjøl í málinum vísa, at fleiri flytingar fara ímillum felagið á Kypros og fleiri føroysk feløg, sum Samherji eigur í. Men hvørki Anfinn Olsen, stjóri í fleiri feløgum, ella Bjørn á Heygum, nevndarlimur og nevndarformaður í fleiri feløgum, siga seg hava nakran kunnleika til tilknýti til Kypros.